News

Listasafn Islands

VATNSMÝRI / 102 REYKJAVÍK  - NIÐURSTÖÐUR ÚR HUGMYNDASAMKEPPNI- SÝNING - UPPBOÐ OG VIÐBURÐIR

Keppnin hófst í lok mars 2007 og var þátttaka heimil fagfólki í arkitektúr og skipulagi um allan heim.  Mikill áhugi reyndist vera á keppninni enda óvenjulegt að kallað sé eftir hugmyndum um svo stórt svæði nálægt miðbæjarkjarna höfuðborgar.  Alls bárust 136 tillögur víðs vegar að úr heiminum.  Keppendur höfðu aðgang að umfangsmiklum gögnum um skipulagsforsendur svæðisins, ásamt skýrslum um samráð við borgarbúa og hagsmunaaðila um þá möguleika sem Vatnsmýri kynni að bjóða upp á.  Í forsendum var ekki tekin afstaða til þess hvort flugvöllur væri áfram á svæðinu heldur kallað eftir hugmyndum um þróunarmöguleika.

Dómnefnd var skipuð þremur borgarfulltrúum og fjórum valinkunnum fagmönnum á sviði skipulags og uppbyggingar.  Formaður dómnefndar var Dagur B. Eggertsson en auk hans sátu í dómnefnd borgarfulltrúarnir Hanna Birna Kristjánsdóttir og Gísli Marteinn Baldursson.  Aðrir í dómnefnd voru Joan Busquets, prófessor í borgarskipulagi við Harvard háskóla, fyrrum skipulagsstjóri í Barcelona og arkitektarnir Steve Christer, Reykjavík, Kees Kaan, Rotterdam og Hildebrand Machleidt, Berlín en Busquets og Machleidt hafa langa reynslu af skipulagi stórra borgarhluta, m.a. svæða þar sem flugvellir hafa vikið fyrir byggð.

Samhliða sýningunni er gefin út vegleg bók með öllum tillögum.

Í tengslum við sýninguna verða ýmsir viðburðir í Listasafni Reykjavíkur Hafnarhúsi.
 
Að kvöldi sýningaropnunardags, þann 14.febrúar kl. 20:00 verður opið “uppboð” á lóðum í Vatnsmýr með hliðsjón af vinningstillögu undir umsjón Guju Daggar Hauksdóttur arkitekts og sýningarstjóra.
 
Föstudaginn 15.febrúar kl. 16:00, munu verðlaunahafar kynna tillögur sínar og dómnefnd gera grein fyrir niðurstöðum sínum. Að því búnu verður opnað fyrir umræður um framtíðarsýn og skipulag borgar í Vatnsmýrinni.
 
Laugardaginn 16.febrúar kl. 14:00 mun Guja Dögg Hauksdóttir arkitekt og sýningarstjóri annast leiðsögn um sýninguna.
 
Sunnudaginn 17.febrúar kl. 14:00 mun Steve Christer arkitekt og dómnefndarmaður annast leiðsögn um sýninguna
 
Fimmtudaginn 21.febrúar kl. 17:00 mun Massimo Santanicchia arktitekt halda fyrirlestur um fagurfræði og tíðaranda í skipulagi borga.


Sýningin á tillögunum verður opin í Listasafni Reykjavíkur, Hafnarhúsi 14-21 febrúar og eftir það í upplýsingaskála Skipulags-og byggingarsviðs, Borgartúni 3, á opnunartíma sviðsins.



Printed of the web Reykjvik Art Museum, www.reykjvikartmuseum.is 29.02.2014